الجيل العاشر قادم وبقوة .. ! | مراجعة الـ Redmi 10 الجديد 🔥

* المقدمة  *

بعد ما الريدمي 8 والريدمي 9 وقت نزولهم كانوا عاملين قلق شديد وسط الموبايلات التانية وكانوا مهمين وبيتسأل عليهم كتير وحققوا مبيعات ضخمة جداً مشاء الله .. لأنهم ببساطة بيقدمو قيمة ممتازة جداً مقابل سعر ممتاز .. والموبايلات دي لحد دلوقتي موجودة جديدة في المحلات وبتتباع بكمية محترمة جداً ..

وانهارد ريدمي بتكمل مشوارها وبتنزل الجيل العاشر من سلسلة الريدمي ومع موبايل جديد وهو الريدمي 10 .. وف الفيديو ده انا جاي اقولك ع موصفات الموبايل .. عيوبه .. مميزااته .. وايه التغيرات اللي حصلت ف الموبايل ده عن الجيل اللي فات الريدمي 9 ... بس قبل مانبدأ متنساش اللايك الجميل والشير بيساعد عشان الفيديو يوصل لكل الناس المهتمة .. وسبسكرايب ف القناة وويلا بينا نبدأ الريفيو ...

Redmi 10

1 . التصميم :

ريدمي غيرات نظرتها عن تصميم الريدمي 9 القديم اللي كان مش وحش خالص بس مشكلته انه كان بيحسسك انه تصميم رخيص وكان باين عليه انه فئة اقتصادية جداً .. والحكاية دي اختلفت خالص مع الريدمي 10 واللي جاي بتصميم شيك جداً هيحسسك المرة دي بفخامة التصميم وهتحس انك ماشي بموبايل فئة متوسطة علياً .. وعلفكرة تصميم الموبايل ده واخد من تصميم وشكل كاميرات الـ Poco X3 GT جامد وشكل نافذة الكاميرات شبهها اووي.

تخانة الموبايل 8.9 ملم مع وزن 181 جرام .. وزن وتخانة معقولين .. وعشان تكمل سيمتريه الشكل والتصميم هتلاقي عندك سماعة تحت دي الطبيعية وزيها تاني فوق جنب مستشعر الـ IR وده بيدلك احساس الفخمة والاختلاف والسيمتريه وف نفس الوقت الصوت الاستريو اللي هتلاقيه متوزع بشكل جميل وطالع من فوق ومن تحت فا الصوت بالشكل ده هيبقي مميز جداً وكمان مش هيبقي في هز في الظهر لأن الصوت هيبقي متوزع بشكل طريف زي ماقولتلك .. ألوان الموبايل بينزل بـ 3 أل وان الرمادي الأبيض الأزرق .

2 . الشاشة :

بالنسبة للشاشة وهنا تبدأ التطورات والاختلافات مع الجيل العاشر من ريدمي .. شاشة الـ ريدمي 10 شاشة بحجم6.5 أنشIPS LCD  بدقة +FHD وبكثافة بيكسلات 405 بيكسل لكل إنش ومع تردد 90Hz ... شاشة مقبولة جداً بالسعر ده شاشة متوسطة ولا هيا احسن شاشة ولا الاوحش .. حاجه كده نص نص .. لكن لو قارنتها بأي شاشة أموليد تخسر طبعاً من ناحية - تشبع الألوان - زوايا الرؤيا - سطوع تحت الشمس - وحتي وأن كانت بمعدل تحديث أقل يعني 60 هيرتز .. او ده يرجعلك .. تختار شاشة IPS 90Hz ولا  AMOLED 60Hz "أحب اسمع رأيك ف الكومنتات .. !"

3 . المعالج والأداء :

بالنسبة للمعالج والاداء – معانا انهارده معالج جديد اول مرة ينزل ف موبايل وهو الـ MediaTek Helio G88 بتكنولوجيا الـ 12 نانو مع معالج رسومي من نوع Mali-G52 MC2 .. المعالج ده أداءه مش فارق كتير عن الـ G85 & G80 ... يعني مفيش تغيير جذري في الاداء نفسه .. الفرق طفيف جداً

الموبايل من ناحية الاستخدام العادي والمهام اليومية وتصفح وبرامج وكل الكلام ده مش هتواجه معاه اي مشكلة بربع جنيه .. وكمان من ناحية الالعاب هيأدي معاك من غير اي مشاكل .. جربت لعبة كول اوف ديوتي اشتغلت علي Medium في الجرافيك و High في الفريم ريد .. أداء مقبول .. سخونية معقولة .. بس خد بالك متسرحش بخيالك الموبايل ف الاول وف الاخر سعره اقل من 3000ج.

4 . الكاميرات :

كاميرا رباعية .. اساسية 50 ميجا بكسل بفتحة عدسة F/1.8 .. الكاميرا الثانية 8 ميجا بكسل بفتحة عدسة F/2.2 ودي بتاعت التصوير الواسع أما الكاميرا الثالثة والرابعة 2 ميجا بكسل بفتحة عدسة F/2.4 واحدة ماكرو وواحدة للعزل والبورترية وعندك فلاش أحادي من نوع ليد ... الكاميرا الأمامية 8 ميجا بكسل بفتحة عدسة F/2.0 ..

أداء الكاميرات متغيرش بالنسبة المحسوسة .. الاداء نفسه متوسط ولا هو وحش للدرجة ولا هو التوب ف الوقت .. حاجه كده ف النص .. فا انت كشخص عادي بيتصور صور يومية عادية وخروجات والكلام ده كله .. فا مش هتحس بأي تقصير ف اداء الكاميرات بالسعر ده هتبقي راضي جداً ..

بالنسبة لتصوير الفيديوهات .. الموبايل اخره FHD 1080 بكسل بـ 30 فريم في الثانية الواحدة و بيصور علي جودة الـ HD بدقة 720 بكسل بـ 30 فريم في الثانية الواحدة.

5 . الحماية والمستشعرات :

البصمة على زرار الباور .. سريعة كويسة جداً .. والـFace Unlock معقول جدا .. الموبايل ده بينزل بنظام تشغيل أندرويد 11 مع سوفت وير شاومي الجديد MIUI 12.5 .. بالنسبة للشبكات بقى فا الـ WiFi وشبكات الاتصال علي قدهم شوية بس يظلوا مقبولين جداً بسعر الموبايل ده ... بالنسبة للمستشعرات .. معظم المستشعرات موجودة وشغالة من غير اي مشاكل زي تسارع قرب بوصلة جيروسكوب ... وعندك مستشعر الـ IR  موجود ف موبايل تحت 3000ج .. كويس جداً .. ومنفذ ال 3.5 ملم موجود تحت في الموبايل بس مفيش السماعة نفسها .. يعني مش موجودة ف العلبة .. تنازلات سخيفة الصراحة من ريدمي ..

6 .البطارية والشحن :

البطارية بحجم 5000 مللي أمبير .. ادائها كويس قعدت حوالي 7 ~ 8 ساعات شاشة مفتوحة .. وقت إستخدام معقول أوي مع المعالج اللي المفروض بيستهلك البطارية جامد ومش موفر للدرجة .. منفذ الشحن USB Type C

الشاحن المرفق مع الموبايل 18 وات .. بيشحن البطارية في حوالي ساعتين ساعتين وربع .. وقت شحن طويل نسبياً لكن ارجع واقولك الموبايل معداش الـ 3000ج .. فا متمسكش ف النقطة دي

7 .سعر الموبايل :

سعر الموبايل مكانش اتحدد بشكل رسمي وقت تصوير الفيديو لكن الاسعار المتوقعة :

للنسخة 64 جيجا مع 4 جيجا رام بسعر 2600 جنية .

للنسخة 128 جيجا مع 4 جيجا رام بسعر 2900 جنية .

للنسخة 128 جيجا مع 6 جيجا رام بسعر 3200 جنية .

 ☑️متنساش تتفرج علي فيديو المراجعة علي اليوتيوب :

أفضل  موبايلات مابين سعر 3000ج - 4000ج في السوق المصري

* المقدمة *

فئة سعر مابين 3000ج لـ 4000ج فئة مميزة جداً وهي الاكثر مبيعاً للشباب .. اللي بيقبض بالـ 3000 – 3500 – 4000ج ربنا يسهل للجميع طبعاً ، فا في اللي يقولك انا هخلي مرتب الشهر ده مش هصرف منه حاجه وهشتري موبايل جديد واغير الموبايل اللي معايا ده .. لكن بيكون محتار مابين الموبايلات الكتيرة الموجودة بالهبل ف الفئة دي .. فا انا ف الفيديو ده جاي اقولك علي افضل موبايلات بتقدملك أعلي الامكانيات اللي ممكن تاخدها بالسعر ده وبأقل عيوب وتضحيات ممكنة .. وانا مش عايز اطول عليك عشان الفيديو هيبقي طويل طبيعي لكن هحاول انجز علي قد ماقدر وف نفس الوقت ادي لكل موبايل حقه .. فااا يلا بينا نبدأ ...

 ( 1 )Redmi Note 10s

1 . التصميم :

ريدمي نوت 10 اس موبايل خفيف وصغير .. نسخة من ريدمي نوت 10 العادي في التصميم والشكل علشان مطولش عليك في الجزئية دي ... خامات بالكامل بتيجي من البلاستيك .. وزن 178 جرام وتخانه 8.3 ملم .. موبايل فعلا لطيف جدًا في الاستخدام بايد واحدة بدون اي مشكلة.

الكاميرات مش بارزه جامد .. والجراب المرفق بيغطي البروز بالظبط ولا أكتر ولا أقل .. وخلينا نتفق على ان خلاص مبقاش في خامات زجاج تحت الـ 4 الاف جنية.

2 . الشاشة :

تبص على الشاشة هتلاقي نفس شاشة ريدمي نوت 10 العادي برده .. شاشة 6.43 بوصة AMOLED بجودة FHD+ بتردد 60 هرتز فقط .. وشاومي مقدرتش تحط تردد اعلى في الفئة السعرية علشان تحافظلك على الشاشة AMOLED.

انا شايف ريدمي نوت 10 العادي 60 هيرتز وريدمي نوت 10 برو 120 هيرتز .. كنت على الأقل احب اشوف نوت 10 اس 90 هيرتز كانت هتبقى مقبولة اكتر .. بس ارجع واقولك فرق السعر مش كبير بين العادي والـS. الشاشة سطوعها حلو وألوانها ممتازة

3 . المعالج والأداء :

ندخل على الأداء .. وده الفرق الجوهري بين نوت 10 العادي ونوت 10 اس .. معالج Helio G95 بتكنولوجيا 12 نانو .. المعالج ده أقوى بفرق ملحوظ عن سناب دراجون 678 اللي موجود في ريدمي نوت 10 .. في الأداء العادي وفي الألعاب .. الموبايل ده كان ناقصه يبقى بتردد اعلى من كده .. 90 هيرتز مثلًا على الاقل علشان تحس انه ناعم .. هو سريع بس مش ناعم كفاية.

ولكن اللي يحسب له انه الوحيد اللي جربته مؤخرا ولاقيت ببجي بتشتغل على HDR Ultra .. جودة مفتوحه عادي في اللعبة .. وكول اوف ديوتي على Very High جرافيك .. تجربة الألعاب كويسة جدا مع الشاشة الـAMOLED والصوت Stereo.

ولكن في نقطة .. الموبايل بيسخن بسرعه .. والسخونية ملحوظة في جسم الموبايل واحب اقولك ان الجهاز ده أكتر جهاز فيه ميدياتيك Helio G95 بيسخن .. بيسخن اكتر من ريلمي 8 واكتر من Infinix Note 10 Pro..

4 . الكاميرات :

كاميرا خلفية 64 ميجا بيكسل فتحة عدسة F/1.8 والتانية 8 ميجا بيكسل تصوير واسع والتالتة ماكرو والرابعة عزل .. والسيلفي 13 ميجا بيكسل مع فتحة عدسة F/2.5.

للوهلة الأولى هتفتكر ان الكاميرات أحسن بكتير من ريدمي نوت 10 العادي .. عشان يعني الـ10S بكاميرا 64 ميجا بيكسل انما نوت 10 العادي بدقة 48 ميجا بيكسل بس.

ولكن اللي اقدر أقولك عليه ان معالجة كوالكم والمستشعر الـ48 ميجا بيكسل بتوع النوت 10 العادي ممتازين عكس الـHelio G95 اللي معالجة الصور فيه مش لذيذة والمستشعر الـ64 ميجا بيكسل مش فارد عضلاته.

كاميرا ريدمي نوت 10 اس هي كاميرا مقبولة جدًا تحت الـ4000 جنية .. اما النسخ اللي كسرت حاجز الـ4 الاف مش هتكون الأفضل خالص في سعرها.

بالنسبة بقى لتصوير الفيديوهات فالموبايل بيدعم تصوير فيديوهات بجودة 4K مع 30 فريم لكن مفيش مثبت إلكتروني .. الـ1080p مع 30 فريم فيه مثبت إلكتروني، وفي طبعًا ميكروفون اضافي لعزل الضوضاء.

5 . الحماية والمستشعرات :

البصمة على زرار الباور .. سريعة كويسة بس في تجميع بسيط بيحصل في ايقونات الواجهة كالعادة .. والـFace Unlock معقول جدا جدا .. الموبايل ده نازل بسوفت وير شاومي الجديد MIUI 12.5 اللي المفروض ادارة الرام فيه أحسن .. الموبايل مفيهوش NFC .. ايههه ؟!!!  - اه -  للأسف الشديد مفيهوش NFC ومعرفش ليه الحقيقة ... أما Animations الجهاز حسيت انها احسن شوية .. مستشعر التقارب لما جربته لاقيته بيتأخر شوية في فتح الشاشة مش قفلها .. بالنسبة للشبكات بقى فا الـ WiFi كويس جدًا .. شبكات الإتصال زيه زي نوت 10 برو .. ممكن حد يتصل عليك والموبايل موجود عادي ويقوله غير متاح .. تمسك الموبايل تنوره بس الشبكة تيجي ..

6 .البطارية والشحن :

البطارية بحجم 5000 مللي أمبير .. ادائها كويس قعدت حوالي 7 ~ 8 ساعات شاشة مفتوحة .. وقت إستخدام معقول أوي مع المعالج اللي المفروض بيستهلك البطارية جامد ومش موفر للدرجة ..

الشاحن المرفق مع الموبايل 33 وات .. بيشحن البطارية في ساعه .. وقت شحن عظيم جدًا.

7 .سعر الموبايل :

مساحة تخزين 64 جيجا مع 6 جيجا رام بسعر 3600 جنية

مساحة تخزين 128 جيجا مع 6 جيجا رام بسعر 3900 جنية

مساحة تخزين 128 جيجا مع 8 جيجا رام بسعر 4200 جنية

( 2 ) Infinix Note 10 Pro

1 . التصميم :

موبايل كبير ضخم كالعادة .. كبير في الإيد بفضل الشاشة الكبيرة .. والموبايل مش تخين أوي السُمك بتاعه حوالي 7.8 مم وده سُمك معقول جدًا، لكن وزنه في حدود الـ200 جرام يعتبر تقيل .. والخامات كالعادة من البلاستيك.

ظهر الموبايل مقسوم نصين .. النص اللي تحت فيه خطوط بالطول جنب بعض لكن النص اللي فوق لامع أكتر ومفيهوش خطوط .. والموبايل ده للأسف بيلم بصمات بسرعة جدًا وبتظهر فيه البصمات بسهولة.

بروز الكاميرات الخلفية جاي على درجتين .. ومستغرب ان انفينكس هي كمان بقى عندها بروز في الكاميرات، والجراب المُرفق في العلبة بيغطي البروز بالكامل.

2 . الشاشة :

نبص على الشاشة هنلاقيها عملاقة 6.95 بوصة IPS LCD بدقة FHD+ بتردد بيوصل لـ90  هيرتز مع ثقب كبير شوية للسيلفي .. حواف الشاشة هنا كبيرة شوية سواء الحافة السفلية او العلوية .. وثقب السيلفي نفسه كبير شوية.

جودة ألوان الشاشة هنا مش الأفضل .. بمعنى أن دي مش أفضل شاشة IPS LCD ممكن تجربها .. وفي مشكلة واجهتني في بعض فيديوهات اليوتيوب بلاقي أن الألوان بهتانة لو الفيديو ده شغال بـHDR واتوقع المشكلة دي تتحل بتحديث.

ملخص الكلام .. الشاشة مش الأفضل من ناحية الألوان زوايا الرؤيا و السطوع تحت الشمس .. وطبعا مُميزة في ان حجمها كبير لو انت من محبي الشاشات الكبيرة اوي دي ..

3 . المعالج والأداء :

معالج ميدياتيك Helio G95 .. معالج Gaming شديد .. المعالج ده أدائه قوي .. وسريع ونشط علطول .. بس على حساب استهلاك الطاقة لإن معمارية تصنيع 12 نانو كتير شوية .. ومع الضغط عليه شوية هتلاقيه بيسخن سخونية أزيد من اللازم شوية .. والمعالج ده انا مش شايف انه عنده مشكلة في تشغيل الـ 90 هيرتز نهائيًا .. بل بالعكس انا حاسس انه مشغلهم ولا الهوا.

جربت لعبة ببجي لاقيت اخرها High HD .. مفيش اعدادات تشغيل أعلى .. واللعبة بتشتغل بكفاءة .. لعبة كول اوف ديوتي بتشتغل على Very High بدون اي مشاكل.

4 . الكاميرات :

الكاميرا رباعية .. الأساسية 64 ميجا بيكسل فتحة عدسة F/1.9 والتانية 8 ميجا بيكسل للتصوير الواسع وبتشتغل Macro برده والعدسة التالتة والرابعة ملهمش وظيفة حقيقية .. والسيلفي 16 ميجا بيكسل فتحة عدسة F/2.0.

ولما جربت الكاميرات .. لسه انفينكس محتاجة تطوير كبير في معالجة الصور .. الـHDR ضعيف وساعات كتير مش بيشتغل مع اني مشغله في التطبيق بتاع الكاميرا .. والألوان بتطلع مش مشبعة فا تحس أن الصور ساعات بتبقى بهتانة وساعات بتطلع مش مظبوطة ده غير البورترية ساعات بيغلط.

السيلفي برده فيه نفس القصة بتاعت الألوان .. هتحسها برده ساعات مش مظبوطة وهتحتاج تتدخل فيها .. يعني تتصور وبعد كدا تعدل الصور .. او تتصور اصلًا بتطبيق تصوير مختلف زي ما 90% من البنات بيعملوا.

بالنسبة لتصوير الفيديوهات بالموبايل فا هو بيصور لحد جودة 4K مع 30 فريم وبيصور على 1080p .. وفيه Ultra Stady Mode لتحسين ثبات الفيديو .. لكن مش بتشتغل على جودة الـ4K .. وللأسف مفيش ميكروفون اضافي لعزل الضوضاء.

5 . الحماية والمستشعرات :

بصمة الموبايل على زرار الباور .. وسريعة مفيهاش اي مشاكل .. والـFace Unlock سرعته معقولة جدا برده .. والموبايل مفهوش لمبة اشعارات .. مفهوش NFC .. مفهوش ميكروفون اضافي لعزل الضوضاء.

المستشعرات كلها شغالة وحقيقية .. ومستشعر التقارب مُمتاز وبيقفل الشاشة في المكالمات بدون اي مشاكل .. وكمان في تسجيل مكالمات مش بيقول للطرف التاني إنك بتسجله.

صوت الموبايل نفسه Stereo .. الصوت عالي وكويس بس ده مش اعلى صوت Stereo ولا اقوى Bass ممكن تاخده.

اما بالنسبة لقوة شبكات الـWi Fi والإتصال فالتقييم فوق المتوسط .. مش هتواجه معاهم مشاكل.

 6 .البطارية والشحن :

بطارية الموبايل ده 5000 مللي أمبير .. استحملت معايا حوالي 7 ساعات شاشة مفتوحة .. علشان المعالج استهلاكه عالي .. فا هتحس انها بطارية 4000 مللي امبير مش 5000 مللي امبير.

الشاحن المرفق الـ 33 واط بيشحن الموبايل في حوالي ساعة ونص .. اخر 10% من البطارية بياخدوا اكتر من نص ساعة لوحدهم علشان الشحن السريع بيتوقف فيهم علشان يحافظ على البطارية ... حاجه ذكية جداً من انفنكس.

7 .سعر الموبايل :

النسخة الـ128 جيجا مع 8 جيجا رام بسعر 3666 جنية مصري

النسخة الـ256 جيجا مع 8 جيجا رام بسعر 4222 جنية مصري

Ø     والموبايل ده عملنا عنه فيديو مراجعة تفصيلية علي القناة انصحك تتفرج عليه من : هنـــــا 

 

 ( 3 ) Samsung A32

1 . التصميم :

تصميم الموبايل ده تصميم راقي شوية وف نفس الوقت هادئ مفيهوش دوشة جامدة .. ولكن الخامات المستخدمة في الظهر بلاستيك لامع وده بيخلي الموبايل يلم بصمات اكتر من اللازم خلافا عن الـ A52 , A72 اللي ظهرهم بلاستيك ولكن مطفي .. ومستطيل الكاميرات نفسه مش موجود والعدسات طالعه من الظهر علطول ببروز شوية كل عدسة لوحدها من التلاته اللي علي الشمال اللي تحت بعض .. تخانة الموبايل 8.4 ملم مع وزن 184 جرام. وزن وتخانة معقولين جداً وماسكة الموبايل نفسها مريحة وكويسة جداً ...

الوان الموبايل .. باللون الأسود وباللون الأبيض وباللون الأزرق وباللون البنفسجي.

2 . الشاشة :

الشاشة تأتي بشكل النوتش على هيئة الـ Water Drop من نوع Super AMOLED بحجم 6.4 إنش بجودة الـ FHD+ بكثافة بكسلات 411 بكسل لكل إنش مع معدل التردد الأعلى الـ 90Hz  عشان تقدملك تجربة مميزة جداً .. و سطوع عالي تحت الشمس بيوصل لـ 800 نتس ..

والشاشة عليها طبقة حماية من نوع Corning Gorilla Glass الجيل الخامس بالإضافة لدعم الشاشة للوضع المظلم.

3 . المعالج والأداء :

أما عن الأداء فا الموبايل بيجي بمعالج من شركة ميديا تيك Mediatek Helio G80  بتكنولوجيا الـ 12 نانو مع معالج رسومي من نوع Mali-G52 MC2 هو نفس المعالج الموجود في الـ Infinix Note 8 والـ Xiaomi Redmi 9 

الصراحة المعالج مش وحش وأداءه مرضي جداَ لكن النقطة اللي مضايقاني ان المعالج الـ G80 مش فئتة خالص انه ينزل فيها .. المعالج ده موجود في موبايلات تحت ال3000ج و2500ج كمان وسامسونج نفسها عندها الـ A22 لسه نازل مش بقاله كتير وبنفس المعالج وبسعر 3000ج بس .. !

4 . الكاميرات :

الكاميرا الخلفية تأتي بارزة قليلاً عن ظهر الهاتف وتأتي بكاميرا رباعية حيث تأتي الكاميرا الأولى بدقة 64 ميجا بكسل بفتحة عدسة F/1.8 ودي الكاميرا الأساسية والكاميرا الثانية بدقة 8 ميجا بكسل بفتحة عدسة F/2.2 ودي الكاميرا الخاصة بالتصوير الواسع و التالتة والرابعة 5 ميجا بيسكل بفتحة عدسة F/2.4 واحدة مايكرو وواحدة عزل وبورترية .. السيلفي بتيجي 20 ميجا بكسل بفتحة عدسة F/2.2 .

طبعاً صور سامسونج مش محتاجه كلامك عليها هيا تحسها علي قدها شوية لكن تفاصيل وألوان مفيش فضل من كده بالسعر ده ...

5 . الحماية والمستشعرات :

بصمة الموبايل تحت الشاشة بما انها شاشة اموليد .. وسريعة مفيهاش اي مشاكل .. والـFace Unlock سرعته معقولة جدا .. المستشرعات اغلبها موجودة وشغالة زي ... التسارع، القرب، البوصلة ، جيروسكوب ... ...

صوت الموبايل نفسه Stereo .. الصوت عالي شوكويس بس ده مش اعلى صوت Stereo ولا اقوى Bass ممكن تاخده.

يأتي سامسونج A32 بنظام تشغيل اندرويد 11 مع أحدث واجهة من سامسونج One UI 3.0.

 6 .البطارية والشحن :

يأتي الهاتف ببطارية ضخمة بسعة 5000 مللي أمبير. بتقعد حوالي 7 – 8 ساعات شاشة مفتوحة .. وتدعم الشحن السريع بقوة 15 واط.

7 .سعر الموبايل :

النسخة الـ 128 جيجا مع 6 جيجا رام بسعر 3,860 جنية مصري

 ( 4 )Redmi Note 10 Pro

1 . التصميم :

الـNote 10 Pro  جهاز كبير في الإيد .. معمول لمحبي الموبايلات الكبيرة .. ولكن متقلقش الموبايل مش تخين، التخانة بتاعته 8.1 ملم يعني الموبايل يعتبر رفيع ومع وزن حوالي 193 جرام .. وزن كويس جداً لكن يظل الموبايل مش لأي حد أيده صغيرة ... !

العقبة الوحيدة في التصميم هي بروز الكاميرات ..  شاومي خلت البروز على درجتين .. الدرجة اللي ماسكة في جسم الجهاز متينه .. ولكن في درجة تانية للبروز زجاج وطالعة لوحدها لكن لو ركبت الجراب الشفاف اللي جاي معاه ف العلبة انسي اي حاجه تحصل للكاميرات الموبايل بينزل بـ 3 ألوان، الرمادي والأزرق والبرونزي.

2 . الشاشة :

شاشة الـ Redmi Note 10 Pro شاشة كبيرة 6.7 بوصةAMOLED  بدقة FHD+ بثقب صغير أوي للسيلفي .. وكمان الشاشة بتردد 120 هيرتز مع كثاقة بيكسلات 395 بكسل لكل انش .. شاشة مبهرة على الحقيقة بصراحة .. ألوان مشبعة وممتازة وممكن تخليها مشبعة أكتر من إعدادات الواجهة.

لو انت من الأشخاص اللي بتتفرج على فيديوهات كتير والموبايل بالنسبالهم شاشة .. فا شاومي تحسها عامله الموبايل ده ليك .. لانها اهتمت جدا جدا بالشاشة.

سطوع تحت الشمس ممتاز لاقصى درجة .. ثقب السيلفي صغير جدا والحافة السفلية معقولة جدا وده هيخلي التجربة احسن واحسن .. الشاشة عليها حماية Corning Gorilla Glass الجيل الخامس ومتركب عليها سكرينة كويسة ... من الاخر كده ..  كل اما تبص على شاشة الموبايل هتتبسط اكتر واكتر.

3 . المعالج والأداء :

الـNote 10 Pro جاي بمعالج كوالكوم سناب دراجون 732 بتكنولوجيا 8 نانو معالج فئة متوسطة وده نفس المعالج المستخدم في Poco X3 NFC وفعلًا تجربة الإستخدام هنا مشابهه بشكل كبير له.المعالج قوي جداً وقادر فعلاً يشغل الـ 120 هرتز بكل سلاسة وبتحس بيهم فعلاً .. الأداء الرسومي .. ببجي على High HD .. كول اوف ديوتي على Very  High .. فورت نايت بتشتغل على Medium والـFrame Rate فيها بيبقا من 5 لـ30 فريم في الثانية .. والموبايل مش بيسخن .. متقلقش من النقطة دي .. السخونية المعقولة الطبيعية مع الألعاب التقيلة .

4 . الكاميرات :

كاميرا خلفية رباعية الأساسية 108 ميجا بيكسل فتحة عدسة F/1.9 .. والتانية 8 ميجا بيكسل للتصوير الواسع فتحة عدسة F/2.2 .. والتالتة 5 ميجا بيكسل ماكرو والرابعة 2 ميجا بيكسل عزل .. والسيلفي 16 ميجا بيكسل فتحة عدسة F/2.5. .

بص طول ما الإضاءة عالية هتاخد بالكاميرا الخلفية صور مليانة تفاصيل .. تشبع مظبوط ..

بالنسبة للسيلفي .. زاوية التصوير بقت اوسع في ريدمي نوت 10 برو ولكن اوسع في الصور بس .. انما في تصوير الفيديو لسه ضيقه .. الصور بتطلع ممتازة حرفيًا في الإضاءات العالية .. في الإضاءات الداخلية ألوان الصورة بتتغير على حسب اضاءات الغرفة .. ولسه التفاصيل مظبوطة.

بالنسبة لتصوير الفيديوهات بالموبايل فا هو بيصور لحد K4 بس طبعًا مفيش ثبات إلكتروني على الـ K4 .. الثبات الإلكتروني موجود على جودة الـ1080p .. والموبايل فيه ميكروفون اضافي، وبالنسبة لتصوير الفيديوهات بالسيلفي فا بيدعم تصوير بجودة 1080p .. وزاوية التصوير ضيقة جدًا في السيلفي.

5 . الحماية والمستشعرات :

بالنسبة للبصمة هنا موجودة على زِر الباور .. بصمة طيارة، أسرع بصمة من شاومي بالسعر ... مش بتغلط ولا مرة لو فضلت تفتح وتقفل الموبايل .. وكمان الـFace Unlock صاروخي ومش بيلحق يدوب تدوس بيفتح . النوت 10 برو مفيهوش لمبة اشعارات ،وخد عندك كومبو الاضافات اللي شاومي دائمًا بتضيفهم في موبايلاتها :-

دعم الـNFC  -  دعم الـIR Blaster - دعم تشغيل الـRadio - دعم ميكروفون اضافي لعزل الضوضاء - دعم منفذ الـ3.5 مللي - صوت Stereo عالي ومجسم وهيديلك تجربة ممتازة.

6 .البطارية والشحن :

بطارية بحجم 5000 مللي امبير .. مع تشغيل الـ120 هيرتز ورفع إضاءة الشاشة هتعمل معاك من 5 لـ 6 ساعات شاشة مفتوحة .. وقت قليل شوية على بطارية 5000 مللي امبير.

لو قللت التردد لـ60 هيرتز هتقعد معاك من 7 لـ 8 ساعات شاشة مفتوحة ..

منفذ الـ USB يأتي من نوع Type C

والشاحن المرفق مع الموبايل 33 واط بيشحن البطارية في حوالي ساعة و5 دقايق وقت كويس جدًا.

7 .سعر الموبايل :

النسخة الـ64 جيجا مع 4 جيجا رام بسعر 3,975 جنية

النسخة الـ128 جيجا مع 6 جيجا رام بسعر 4,420 جنية

النسخة الـ128 جيجا مع 8 جيجا رام بسعر 4,899 جنية

Ø     والموبايل ده عملنا عنه فيديو مراجعة تفصيلية علي القناة انصحك تتفرج عليه من : هنـــــا 

☑️متنساش تتفرج علي فيديو الترشيحات علي اليوتيوب